O presidente do PPdeG mantén un encontro con representantes do sector turístico en Carnota, acompañado de voceiros e alcaldes da comarca
- Fai fincapé en que se consolidara a desestacionalización, se recuperara o turismo internacional e aumentara a rendibilidade hoteleira.
O presidente do PPdeG, Alfonso Rueda, comprometeuse hoxe a seguir escoitando aos profesionais do sector turístico, “os que de verdade entenden”, para poder aplicar novas medidas a partir do 18 de febreiro, despois de que a Comunidade batera o seu récord de visitantes en 2023.
“Galicia está de moda, moita xente nos mira como destino. Con sentidiño, e sen obsesionarnos coas cifras, creo que temos por diante un futuro esperanzador no turismo, que supón unha parte importante da nosa economía”, subliñou o líder dos populares durante un encontro con representantes do sector no hotel do faro de Lariño, en Carnota, acompañado de voceiros e alcaldes da comarca.
Rueda sinalou que, a falta de coñecer as cifras do mes de decembro, Galicia superou en 2023 a súa mellor cifra de visitantes: 6,7 millóns aloxados en establecementos turísticos ata novembro, cando en todo 2022 foron 6,5. É dicir, o récord anual que había ata o de agora superouse en tan só 11 meses.
“Os resultados están aí, son espectaculares”, salientou, e tamén fixo fincapé en que se consolidara a desestacionalización —cada vez nos visitan máis persoas e durante todo o ano—; se recuperara o turismo internacional, que xa representa o 30% do total; e aumentara a rendibilidade hoteleira.
O presidente incidiu en que “non é tanto a cifra, senón a calidade” e aproveitou para lembrar o éxito do Bono Turístico da Xunta de Galicia, que contribuíu a que os galegos viaxaran pola súa Comunidade e a coñeceran aínda mellor.
“ESCOITAR SERVIU PARA PLANIFICAR O REXURDIMENTO TURÍSTICO”
Segundo Rueda, Galicia aprende cada día dos seus acertos e dos seus erros, ao tempo que se apoia nun “magnífico sector”, que sabe facer as cousas “moi ben”.
“Queremos seguir escoitándoos, como levamos facendo desde hai moito tempo, especialmente desde a pandemia, na que pasaron un momento moi duro”, dixo.
Ese diálogo durante a covid, remarcou, serviu “para saber que axudas había que dar, para ser eficaces en dalas e, deste xeito, para planificar o que foi o rexurdimento turístico en Galicia”.
“En aquel momento parecía imposible que nos fósemos a recuperar, pero fixemos as cousas ben e fixémolas cos que saben de verdade en Galicia de turismo, que son os profesionais”, concluíu o líder dos populares galegos.
