O Bloque Nacionalista Galego vai trasladar ao Comité de Seguimento Municipal da Covid-19 a proposta de que a Concellaría de Xuventude poña en marcha unha programación dixital con actuacións e actividades para as crianzas.
Con esta iniciativa, despois de varias semanas de confinamento e na perspectiva de que este poida prolongarse inda algún tempo máis, a fronte nacionalista pretende que o Concello de Vigo contribúa a facelo máis “amigábel” para as máis cativas, que son as que máis o están a sufrir.
Segundo explicou o concelleiro do BNG en Vigo, Xabier P. Igrexas, trataríase de artellar unha programación a través dunha plataforma dixital con actuacións musicais, pezas teatrais, diferentes obradoiros ou actividades artísticas, focadas precisamente a nenas e nenos. “Isto permitiría facer máis confortábel esta situación na que os nosos nenos e nenas non poden saír á rúa, nin poden acudir a esas actuacións e actividades das que tanto gostan e necesitan”, explicou.
