Detectouse gran uso fraudulento das mesmas durante o primeiro semestre do ano, polo que a Policía intensifica o seu labor de concienciación e sensibilización
A Policía Local de Mos informa de que foron retiradas durante o primeiro semestre deste ano 2023 un total de 35 tarxetas de estacionamento en zonas acoutadas para persoas con mobilidade reducida por uso fraudulento.
Así, a Policía Local mosense vela por un uso correcto e adecuado das prazas e tarxetas de estacionamento para persoas con mobilidade reducida, comprobando que o vehículo ten a correspondente tarxeta e que o titular se atopa no interior do vehículo á chegada ou á saída da praza reservada.
Durante os primeiros seis meses do presente ano 2023, os axentes detectaron gran cantidade de tarxetas que estaban a ser utilizadas de forma fraudulenta por familiares, amigos ou coñecidos do titular da mesma, sen que este estivese presente, e mesmo ás veces o titular xa falecera. Tratándose este dun feito sancionable, polo que se denunciou aos infractores e retiróuselles a tarxeta, remitindo o informe por uso fraudulento ao organismo emisor correspondente.
Tamén se detectou o uso regular de tarxetas fotocopiadas ou reproducidas dixitalmente, o que está expresamente prohibido, e pode ser constitutivo dun delito de falsidade documental.
Desde xeito, a Policía Local de Mos quere facer un labor de concienciación e sensibilización lembrando que, estes estacionamentos non son un privilexio, son unha necesidade; e os infractores deben poñerse na pel de quen ten a necesidade de utilizar estas prazas debido ás súas limitacións de mobilidade.
