A Asociación Veciñal de Teis, organiza un acto cultural para conmemorar o nacemento de Rosalía de Castro (23/02/1837), este vindeiro sábado 22 de febreiro ás 12:00 horas, diante do edificio do antigo centro de saúde ( rúa Enrique Lorenzo).
Neste acto contaremos coa actuación do grupo de gaitas da Asociación e a lectura pública de textos de poemas de Rosalía de Castro.
Este acto cultural queremos difundir a obra da nosa poeta nacional, referente da nosa literatura, comprometida ao longo da súa vida co seu pobo, a través da súa obra literaria. Ademais, queremos amosar a importancia de promover o seu uso e a defensa da nosa lingua.
Case 11 anos, agardando pola biblioteca.
A decisión de celebrar este acto cultural diante do edificio do antigo centro de saúde, ten como obxectivo lembrar a necesidade dunha biblioteca para Teis e que se anunciou hai case 11 anos.
A nosa cidade conta cun escaso número de bibliotecas, a última foi a biblioteca “ Xosé Neira Vilas “, no Calvario, inaugurada en 2011, e desde aquela non se construíu ningunha biblioteca máis en Vigo.
Defendemos que a biblioteca de Teis, sexa unha dotación cultural do século XXI, que conte con libros, e non se limite a unha simple sala de lectura, como se pretende desde o goberno municipal.
Despois de tantos anos queremos avanzos reais na construción da biblioteca de Teis, pois até o de agora, nestes case 11 anos, houbo moitos anuncios máis de 20, infografías, pero ningún avanzo real.
A día hoxe aínda non se derrubou o edificio actual, paso previo necesario para a construción da nova biblioteca, no orzamento municipal de 2025 figuran 900.000 euros e aínda non se gastou nin un só euro, nesta dotación cultural.
Desde a Asociación Veciñal de Teis, esiximos a Abel Caballero, Alcalde de Vigo, coñecer o proxecto definitivo que garanta unha biblioteca para Teis, unha data para o derrubo do actual edificio e para o comezo das obras da nova biblioteca
