― Un dos obxectivos do Sergas é mellorar o infradiagnóstico desta patoloxía, especialmente nas mulleres
― A Consellería de Sanidade presentou un novo proceso asistencial integrado desta patoloxía elaborado con perspectiva de xénero
O servizo de Pneumoloxía da Área Sanitaria de Vigo habilitou unha mesa informativa no hospital Álvaro Cunqueiro para informar á cidadanía sobre a enfermidade da Epoc. Esta actividade enmárcase nas diferentes accións conmemorativas do Día Mundial da Enfermidade Pulmonar Obstrutiva Crónica que este ano se desenvolve baixo o lema “Respirar é vivir. Actúa pronto”.
Nesta ocasión os profesionais realizaron un test aos usuarios que se achegaban ata o punto informativo, para valorar o seu coñecemento da enfermidade. Aqueles que acertaron o cuestionario recibiron un agasallo.
Con esta actividade, os profesionais querían dar a coñecer á poboación esta patoloxía, que segue sendo unha das máis descoñecidas e menos diagnosticadas, a pesar de que a súa prevaleza foi incrementando nas últimos anos. De feito, en Galicia afecta ao 16 dos adultos de máis de 40 anos. Ademais, en torno ao 73% das persoas galegas que a padecen non o saben.
O tabaco, principal causa
A Enfermidade Pulmonar Obstrutiva Crónica (EPOC) é unha obstrución crónica das vías respiratorias que dificulta moito a respiración aos afectados e que está causada fundamentalmente polo tabaco. Os síntomas máis comúns da enfermidade son a dispnea (respiración difícil ou desproporcionada á actividade física realizada), tose, ou aumento da produción de esputos, entre outros. Estes síntomas poden limitar a capacidade dos pacientes para desenvolver as súas actividades cotiás.
Reducir infradiagnóstico nas mulleres
Precisamente, hai uns meses a Consellería de Sanidade presentou a actualización do Proceso Asistencial Integrado (PAI) de Enfermidade Pulmonar Obstrutiva Crónica (EPOC) que engade como principal novidade a perspectiva de xénero no diagnóstico e tratamento.
O obxectivo é reducir os niveis de infradiagnóstico estimado entre as mulleres (86%), xa que é máis elevado que en homes (67,6%).
Asimesmo os sintomas son diferentes en función do sexo do paciente: as mulleres presentan maior porcentaxe de disnea, sibilancias, hiperreactivididade bronquial e peor calidade de vida que os homes e, pola contra, as mulleres refiren menos tose e expectoración.
Así unha das iniciativas para reducir o infradiagnóstico, vai ser a promoción nos centros de atención primaria, da realización de espirometrías a mulleres fumadoras de máis de 10 paquetes ao ano.
Igualmente, incidirase nos programas de deshabituación tabáquica nas mulleres, en liña co Plan Inspira Saúde da Consellería de Sanidade.
