O delegado do Goberno en Galicia, Pedro Blanco, reafirmou o compromiso do Goberno de España co acceso dos galegos e galegas a unha vivenda digna. O delegado subliñou que “Vigo é un exemplo claro deste esforzo, con investimentos superiores aos 43 millóns de euros nos últimos anos en políticas de Vivenda e Axenda Urbana”. “Apostando pola cogobernanza naquelas políticas que son competencia das Comunidades Autónomas, como é a vivenda e da man do Concello, estamos apoiando a creación de vivenda e mellorando barrios como Navia, Coia, Bouzas, o casco vello ou Teis, impulsando novas vivendas de protección oficial e garantindo unha cidade máis accesible”, explicou.O delegado do Goberno, acompañado polo alcalde de Vigo, Abel Caballero, visitou hoxe os proxectos de construción de 240 vivendas de protección oficial no barrio de Navia. Estas vivendas contan cunha achega estatal de 11,5 millóns de euros procedentes do Plan de Recuperación, canalizada a través da Xunta de Galicia. “Hai un dato moi claro: 2 de cada 3 euros investidos en vivenda pública en Galicia proceden do Goberno de España, que destinou, nos últimos anos, máis de 520 millóns de euros en vivenda pública”, explicou, lembrando que “estamos presentes en todos os programas en materia de vivenda pública, colaborando cos concellos e coa Xunta, para garantir unha vivenda digna, nun esforzo sen precedentes por parte do ministerio que dirixe Isabel Rodríguez para facilitar o acceso á vivenda, rehabilitar barrios e, en definitiva, mellorar a vida de miles de familias galegas”.
Ademais, Pedro Blanco detallou, entre outros investimentos, que o Goberno destina 6,5 millóns de euros do Plan de Recuperación ao Programa de Rehabilitación de Vivendas a Nivel de Barrio. Esta iniciativa permitirá a rehabilitación de 970 vivendas en Vigo, beneficiando barrios como Beiramar, Coia, Bouzas, A Salgueira, Casco Vello, Lavadores, etc. No marco das políticas de Axenda Urbana, a implantación das Zonas de Baixas Emisións (ZBE) dentro do PRTR supuxo un investimento de máis 21 millóns euros en Vigo para fomentar a mobilidade sostible e contribuír á transformación da cidade.
Pedro Blanco recordou que hoxe entra en vigor a reforma normativa que lles dá ás comunidades de veciños a última palabra sobre os pisos turísticos nos seus edificios, co obxectivo de garantir a convivencia e evitar o impacto negativo da proliferación descontrolada do alugueiro turístico. Para o delegado esta “é unha medida clave para o equilibrio entre o dereito á vivenda e o turismo”. Así, reclamoulle á Xunta que “colabore na declaración de zonas tensionadas, porque vemos noutros territorios onde se aplica a Lei de Vivenda como se reducen os prezos dos alugueiros”. “A lei funciona, pero precísase responsabilidade e altura de miras por parte de todas as Administracións”, incidiu.
