Un total de 67 técnicos en Coidados Auxiliares de Enfermería (TCAES) están a incorporarse ao Complexo Hospitalario Universitario de Vigo como persoal estatutario fixo, con praza en propiedade. Así, as e os profesionais nomeados están a tomar posesión estes días das súas prazas nos hospitais do Complexo Hospitalario Universitario de Vigo.
Isto supón a incorporación de 67 TCAES aos hospitais do Chuvi, con condición de persoal estatutario fixo, reducindo así o número de persoal temporal, e dotando de maior estabilidade ao cadro de persoal da Área Sanitaria de Vigo. Destes 67 profesionais a maioría xa estaban nesta Área Sanitaria como persoal temporal e cinco proceden de fóra desta Área.
Resolución no DOG
O Diario Oficial de Galicia (DOG), publicou o 30 de setembro a Resolución da Dirección Xeral de Recursos Humanos do Sergas pola que se procede ao nomeamento como persoal estatutario fixo e á adxudicación de destino definitivo ás e aos aspirantes seleccionados no proceso selectivo de estabilización, polo sistema de concurso de méritos, na categoría de TCAE.
Neste proceso, participaron máis de 1.500 profesionais para o acceso por concurso de méritos -sen exame- a 277 prazas na Comunidade Autónoma.
