A Asociación Amigas das Árbores de Vigo presentou esta semana un escrito oficial dirixido ao
Concello de Vigo no que expresa a súa fonda preocupación pola posíbel eliminación de tres árbores de gran porte no ámbito do
novo proxecto de urbanización nas rúas Hernán Cortés e María Berdiales.
Segundo a información dispoñible, o proxecto inicial contemplaba a conservación expresa destas árbores senlleiras, tal e como
recollían os documentos urbanísticos e varias noticias en medios de comunicación locais.
Porén, Amigas das Árbores alerta de que a promotora estaría a preparar a súa eliminación, empregando o habitual pretexto do
“transplante”, fórmula que xa foi utilizada en anteriores ocasións con resultado fatal para o arborado afectado.
Cedros de Don Bosco: un precedente perigoso
A Asociación lembra o precedente da tala dos cedros da Ronda de Don Bosco, que inicialmente figuraban como “a conservar” e
que finalmente foron eliminados durante as obras de humanización. Esta práctica repítese —advirten— como estratexia para
evitar a oposición social durante as fases iniciais das obras.
Normativa clara e obriga de conservación
No escrito, Amigas das Árbores cita varios marcos normativos e obrigas incumpridas:
- O artigo 4 da Ordenanza Municipal de Zonas Verdes, que establece a obrigatoriedade de conservar o arborado urbano
existente. - O prego técnico do contrato de mantemento de zonas verdes, que só permite o transplante de árbores de gran porte con
criterios técnicos estritos e autorización municipal. - As directrices europeas de adaptación ao cambio climático, que priorizan a conservación de árbores maduras como
mitigadores da illa de calor urbana.
Medidas urxentes solicitadas
A Asociación solicita formalmente ao Concello:
- Que se verifique que as árbores sinaladas como “a conservar” non sexan eliminadas nin transplantadas.
- Que se garanta a transparencia, remitindo os informes técnicos sobre o tratamento do arborado.
- Que se exixa á promotora o cumprimento estrito do proxecto aprobado e que calquera actuación sobre as árbores conte
cun informe técnico municipal específico. - Que se responda por escrito dentro do prazo legal coas medidas previstas para garantir a protección efectiva destas
árbores.
Accións legais se continúa o abandono institucional
Amigas das Árbores advirte que, de non atenderse esta demanda,valorará emprender accións legais e administrativas, así como
iniciar unha campaña de denuncia pública.
“A destrución do arborado urbano non é un dano colateral, é unha agresión ambiental reiterada que se disfraza baixo promesas
de conservación que logo se incumpren”, afirma Beatriz de Labra, presidenta da Asociación
